Arsenal ayaa taariikh ka dhigtay horyaalka Premier League intii ay socotay guushi ay ka gaadheen Newcastle United. Ka dib markii ay Liverpool badisay bartamihii isbuuca, Manchester Cityna ay garaacday Bournemouth galabnimadii sabtida, Gunners ayaa la ciyaartay Newcastle iyaga oo 5 dhibcood ka dambeeya hogaamiyayaasha horyaalka premier League. Si kastaba ha ahaatee, wiilasha Mikel Arteta ayaa qaab ciyaareed fiican ku jiray iyagoo 2/0 ku hogaamiyay Newcastle qaybtii hore ee ciyaarta. Qaybtii dambe Arsenal ayaa u awood sheegatay Newcastle waxana goolal u dhaliyay xiddigaha Saka iyo Kiwior iyaga oo ciyaarta ka dhigay 4/0 Intii lagu guda jiray guushii ay ka gaareen Magpies, Gunners ayaa sameysay taariikhdeeda Premier League. Sida laga soo xigtay TNT Sports, Arsenal ayaa dhalisay 17 gool tan iyo markii ugu dambeysay ee hal gool laga dhaliyay, taasoo ah wakhtigii ugu dheeraa aan koox gool laga dhalin premier League. Rikoodhkaas waxa soo afjaray xiddigii hore ee Arsenal Joe Willock kaas oo dhaliyay gool daqiiqadihii ugu dambeeyay ee kulankii ay Gunners garaacday Newcastle.
Chelsea Oo Dhigtay Rikoodh Xun Oo Taariikhda England Ah.
Chelsea ayaa sameysay taariikh aan fiicnayn ka dib markii ay guuldarro ka soo gaartay finalka Carabao Cup ee Liverpool axadii garoonka Wembley. Labada kooxood ayaa soo bandhigay ciyaar cajiib ah iyada oo labada kooxood ku kala bexeen 120 daqiiqo iyada oo Van Dijk dhaliyay goolka guusha daqiiqadii ugu dambeeyay. Laakiin waxa ay ahayd fursad wayn oo ay khasaarisay Chelsea marka la eego in ay Liverpool dhaawacyo hadheeyeen kana maqnaayeen xiddigaha Mohamed Salah, Diogo Jota, Dominik Szoboszlai, Trent Alexander-Arnold, Curtis Jones iyo Alisson Becker. Ryan Gravenberch ayaa ku biiray liiska dhaawacyada kadib makrii laga saaray garoonka sabab la xidhiidha dhaawaca. Kooxda chelsea ayaa sii waday rikoodhkooda xun ee kulamada final-ka ee tartamada maxaliga ah. Chelsea ayaa laga badiyay final-kii 6-aad ee maxali ah waana kooxdii ugu horaysay ee taariikhda England laga badiyo 6 final oo tartamada maxaliga ah.
Toddobaadka cayaaraha Soomaalida oo lagu qabtay Atlanta
ATLANTA — Magaalada Atlanta ee gobolka Georgia ee dalkan Mareykanka waxaa todobaadkan ka dhacay tartamo isugu jiray kubadda cagta iyo kubadda koleyga oo ay ka qeyb galeen kooxo ka kala socday Soomaalida Waqooyiga America. Tartankan oo sanad walba la qabto ayaa waxaa qaban qaabiyeyaashu ay sheegeen inay uga danleeyihiin is-dhexgalka dhallinyarada Soomaaliyeed iyo aragga cayaartooydii cuslaatay oo qaarkood u soo cayaaray xulkii qaranka Soomaaliya iyo kooxihii heerka 1-aad ee Soomaaliya. Maxamed Colaad Xassan ayaa tartanka ka wareystay gudoomiyaha gdudigii soo qaban qaabiyay tartankan Ceydiid Jeenyo.
Wiilka Soomaaliga ah ee jabiyey rikoorka maaratoonka Sweden
Suldaan Xasan oo ah wiil asal ahaan ka soo jeeda Soomaaliya, isla markaana heysta dhalashada dalka Sweden ayaa 2.07.35 ku dhameystay kaalinta 10-aad ee orodka markii ugu horreysay ee uu garoonka ka soo muuqday taasoo kor u qaadday rikoorkii hore ee u yaallay Sweden in hal daqiiqo ka badan. Suldaan ayaa hadda galay kaalinta afaraad ee abid Sweden. Waxay ahayd billow aad loogu riyaaqay marka ay noqoto Suldaan, waxaana lagu ammaanay tababar dheer oo uu waqti badan ku soo bixiyay. Suldaan ayaa dhowr kilomitir ka dib gaabiyay orodkiisa isaga oo ay ka hormareen qaar ka mid ah orodyahannada kale, waxa uuna sameeyay soo laba kacleyn u sahashay in kaalin hore uu ugu dambeyn galo. “Waxa aan yara dedejiyay orodkaygii dhawrkii kiiloomitir ee ugu dambeeyay, taasna waxa ay qayb ka tahay xirfadaha tartanka, ma aanan sameynin qiyaasta tababarka labadii bilood ee lasoo dhaafay, sababtoo ah waxa aan dhaqaaleyneynay tamar badan, laakiin xaqiiqada ayaa ah in aan marnaba niyad jabin oo aan daalin”, ayuu yiri Suldaan Xasan.
Akram Cafiif iyo wiilka kale ee Soomaaliga ah ee guusha u horseeday xulka Qatar
Ka dib markii Qatar ay saddex gool iyo hal kaga badisay xulka Urdun ciyaartii kama danbaysta ahayd ee tartanka Sabtidii, ayaa waxaa baraha bulshada buux dhaafiyay hal ku dhigyo loogu hambalyeynayo xulka Qatar oo gaaray guushii labaad oo xiriir ah, halka dadka qaar ay hambalyo u dirayeen xulka Urdun oo soo gaaray finalka tartanka. Waa markii ugu horreysay taariikhda xulka Jordan uu soo gaaro ciyaarta ugu dambaysa ee tartanka, inkastoo laga badiyay ciyaarta. Kulankan kama danbaysta ee tartanka ma ahayn mid caadi ah, sida ay dad badan qabaan, markii ugu horreysay taariikhda kulanka ugu danbeeya ee Koobka Qaramada Asia, ciyaarta waxaa lagu arkay 3 rigoore oo ay guusha ku raacday xulka Qatar, taasoo keentay in khilaaf iyo su’aal badan oo la iska waydiiyay “waxtarka iyo daacadnimada garsooraha ciyaarta” oo u dhashay dalka Shiinaha.
Sida xiddiga Kansarka ku waayay xiniintiisa uu guusha lama filaanka ah ugu horseeday Ivory Coast
Sebastien Haller ayaa noqday halyeyga xulka Ivory Coast kadib markii ay dib kasoo kabsadeen si ay u garaacaan Nigeria. Taas ayaa u horseeday inay qaadaan koobka Qaramada Afrika 2023. Xulka Maroodiyada ayaa intii uu socday tartanka eryay tababarahoodii iyaga oo dhowr mar ku sigtay inay ka haraan tartanka. Koobkan ayaa noqonaya kii saddexaad oo ay qaadaan xulka Ivory Coast xilli aysan lahayn niyad iyo rejo badan. Waxay Ivory Coast ku bixisay lacag dhan hal bilyan oo doolar martigelinta tartanka, laakiin waxa xulka guuleystay ay helayaan 7 milyan oo doolar, halka xulka Nigeria oo galay kaalinta labaad ay heli doonaan 4 Milyan.
Maxaa sababay geerida laacibkii xulka Galmudug?
Magaalada Dhuusamareeb ee caasimada dowlada goboleeddka Galmudug waxaa shalay ku geeriyooday Muxyadiin Cabdi Muriidi oo kamid ahaa laacibiintii u qaaday koobk Galmudug ciyaarahii dowlad-goboleedyada iyo gobolka Baanadir. Allah u raxmadee Muxyadiin Cabdi Muriidi ayaa ku geeriyooday isbitaalka Central Hospital oo ku yaalla magaalada Dhusamareeb, kadib maalmo kooban oo uu xanuunsanaa sida uu BBC-da u xaqiijiyey gudoomiyaha xariirka kubada cagta Galmudug, Xasan Axmed Shire. Agaasimaha isbitaalka Central Hospital Cali Axmed Barre ayaa sheegay in labo jeer oo kala duwan loo keenaya ciyaartooyga laguna wargaliyay in mudooyinkii danbe uu xanuusanaa oo xataa uusan ciyaarin kulamadii danbe ee kooxdu dheeshay. “Habeen saddexaad goor sideed saac ah ayay noola keenaya, daawooyin xanuun baa’biye iyo gaas ayaan siinay, wuu roonaaday, dorraad ayaa mar kale naloo keenay asaga oo kooma ku jira” ayuu yiri Agaasime Cali Axmed Bare. Waxa uu sheegay in baaritaano kala duwan ay ku sameeyn markii loo keenay balse aysan ka helin wax xanuun ah, wallow uu sheegay in aysan haysan qalabka madax lagu baaro ee Scan-ka isaguna uu aad madax uga sheeganayay. “Madax ayaa aad looga hayay oo uu ka sheeganayay anaguna ma aan haysan scan aan ku baarno oo gobolka oo dhan lagama helo” ayuu hadalkiisa sii raaciyay.
NIN DAB ISKU QABADSIIYEY AFAAFKA HORE EE SAFAARADDA ISRAA’IIL EE KU TAALLA WASHINGTON
Sida ay masuuliyiintu sheegeen nin ayaa xalay dab isku qabadsiiyay banaanka Safaaradda Israel ay ku leedahay Magaaladan Washington. Ninkan oo aan weli magaciisa la shaacin ayaa shaqaalaha gurmadka caafimaadka waxay ula carareen Isbital Washington ku yaala, ka dib markii ciidamo ka mid ah kuwa Secret Service ee ilaaliyaha madaxda iyo diplomaasiyiinta ay damiyeen dabkii uu isqabadsiiyay. War kooban oo waaxda dab demiska ee magaaladan Washington ay soo dhigeen internetka ayey ku sheegeen in xaaladda ninkaasi ay halis tahay. Ciidamada Booliska ee magaaladan Washington iyo kuwa ilaalada madaxda iyo diplomaasiyiinta ayaa baaris ku haya dhacdadan. Safaaradda Israel ayaa xilliyadan dambeba bar tilmaameed u aheyd dibad baxyo joogto ah oo iska soo horjeeda oo ku aaddan dagaalka Israel iyo Xamaaz ee Qaza. Debedbaxyadan iska soo horjeeda ayaa Maraykanka ka dhacayay tan iyo bishii October 7-deedii, ka dib markii Xamas ay gudaha u gashay Israa’iil, kuna dishay 1200 oo qof 253 kalena ay ku qafaalatay. Wixii markaa ka dambeeyay Ciidamada Israel ayaa duulaan ku qaaday Qaza, iyagoo inta baddan magaaladan burburiyay, iyagoo dilay sida saraakiisha caafimaadka ee Falastiiniyiintu ay sheegeen dad ku dhow 30,000 oo qof.
MW XASAN SHEEKH OO SAXIIXAY SHARCIGA ILLAALINTA IYO MAAREYNTA DEEGAANKA
Madaxweynaha Jamhuuriyadda Federaalka Soomaaliya Xasan Sheekh Maxamuud ayaa saxiixay sharciga illaalinta iyo maareynta deegaanka oo ay horray u ansixiyeen labada aqalka ee Baarlamaanka JFS. Wasiirka wasaaradda deegaanka iyo Isbeddelka cimilada ee Xukuumadda Federaalka Soomaaliya Marwo Khadiijo Maxamed Almakhsuumi ayaa madaxweyne Xasan Sheekh uga mahadcelisay inuu saxiixay sharcigaan oo muhiim ah ilaalinta deegaanka. “Waxaan u mahad celinaayaa madaxweynaha JFS Mudane Xasan Sheekh Maxamuud oo maanta saxiixay sharciga ilaalinta iyo Maareeynta Deegaanka ee ay horrey u ansixiyeen Labada aqal ee baarlamaanka JFS” ayey tiri wasiir Khadiijo Maxamed Almakhsuumi. Wasaaraddda deegaanka iyo isbaddelka cimilada ee DFS ayaa in muddo ah ku howlaneed soo saaridda sharci lagu badbaadin karo, laguna maareeyn karo deegaanka. Sharcigan ayaa muhiim u ah illaalinta iyo maareeynta deegaanka si looga hortago, loona yareeyo saameeynta dalkeenu ku yeelan karto isbeddelka cimiladda.
SOMALILAND OO KA HADASHAY BAARITAAN AY KU SAMAYSAY MEYDKA CABDINAASIR DAHABLE
Maamulka Somaliland ayaa shaaciyay Natiijada baaristaan ay ku sameeyeen Meydka Marxuum Cabdinasir Muuse Dahable, oo dhawaan lagu dilay magaalada Muqdisho, kaasi oo Meydkiisa shalay laga dejiyay magaalada Hargeysa. Agaasimaha Guud ee Isbitaalka Hargeysa Dr. Cabdiraxmaan Maxamed Cismaan oo Warbaahinta la hadlay ayaa sheegay in xarig cunaha lagaga ceejiyay Cabdinaasir Dahable, daanka bidixna uu jaban yahay, halka xiniinta bidix iyo isha bidixna ay ka muuqdaan calaamado muujinaya barar iyo dhaawac. Agaasime Cabdiraxmaan ayaa waxa uu sidoo kale sheegay in saddexdii maalmood ee lasoo dhaafay tallaagadi uu ku jiray Maydka Cabdinaasir in laga jaray korontada, waa sida uu hadalka u dhigay Agaasimaha oo xusay in dhibaatooyin la gaarsiiyay marxuumka. Allaha u naxariistee Cabdinasir Muuse ayaa maalmo kahor meydkiisa laga helay gurigii uu ka daganaa magaalada caasimadda ah ee Muqdisho oo lagu dilay, isagoona la tilmaamay inay jirkiisa ka muuqdeen xilligii loo tagayay jirdilo. Cabdinaasir Dahable ayaa katirsanaa Shaqaalaha Hay’adda maamulka hawada ee dowladda Soomaaliya, waxaana uu kasoo laabtay waxbarasho dibada ah oo la xariirtay cilmiga Hagidda Hawada, isagoo horey uga mid ahaa Shaqaalaha ICAO qeybteeda Hargeysa. 0 comment 0
